ⓘ משה האלבערשטאם, קיוויאשד. רבי משה האלבערשטאם, באקאנט ווי רבי משהלע האלבערשטאם, איז געווען דער קיוויאשדער רב אין וויליאמסבורג. ער האט נישט סובל געווען קיין רע, א ..

                                     

ⓘ משה האלבערשטאם (קיוויאשד)

רבי משה האלבערשטאם, באקאנט ווי רבי משהלע האלבערשטאם, איז געווען דער קיוויאשדער רב אין וויליאמסבורג.

ער האט נישט סובל געווען קיין רע, און ער האט ארויסגעטרעטן גאר שארף קעגן יעדן וואס ער האט געזען אלס א שטער פאר קדושה וטהרה.

                                     

1. אפשטאם

רבי משה איז געבוירן געווארן צו זיין פאטער רבי דוד האלבערשטאם, קשאנאווער רבי אין אמעריקע, א זון פון רבי ברוך האלבערשטאם, קשאנאווער רב אן איידעם פון רבי אברהם חיים הורוויץ דער צווייטער פון לינסק, א זון פון רבי מנחם מענדל הורוויץ פון לינסק, א זון פון רבי אברהם חיים הורוויץ), א זון פון רבי משה האלבערשטאם פון קשאנאוו, א זון פון רבי דוד האלבערשטאם פון קשאנאוו, א זון פונעם ״דברי חיים״ פון צאנז.

                                     

2. ביאגראפיע

רבי משה האט געהייראט א טאכטער פון רבי אלעזר שפירא פון קיוויאשד, א זון פון רבי מרדכי פון בערשט. ער האט איבערגענומען דעם ביהמ"ד וואס שטייט אויף פען סט. אין וויליאמסבורג. פון זיין שווער רבי אלעזר שפירא וואס איז נאך געווען רב אין דער שטאט קיוויאשד אין אייראפע.

קיוויאשד האט אמאל פארמאגט א תלמוד תורה און א ישיבה קטנה, און ווען זיין שווער האט נאך געלעבט איז ער דארט געווען ראש ישיבה. עס האט זיך פארמאכט אין די פריע התש"ם יארן צוליב פארשידענע סיבות.

ער איז געווען א שארפער קנאי, עס ווערט דערציילט אז ווען ער האט אלס בחור געלערנט אין בית מדרש עליון אין מאנסי, איז איינמאל געקומען דארט באזוכן א אנגעזעהענער מאדערנער איד, און מען האט יענעם מכבד געווען מיט א עלי, אבער קיוויאשדער רב -זייענדיג א פייערדיגער קנאי- האט דאס נישט געקענט סובל זיין, איז ער אליין שנעל צוגעשפרינגען צום באלעמער, און שנעל געמאכט די ברכות, און אזוי עס אויסגעכאפט פון דעם איד, עס ווערט דערציילט אז הגאון רבי ראובן גראזאווסקי דער ארטיגער ראש ישיבה האט אים דערנאך געזאגט אז ער האט גוט געטאן.

ער איז געווען גאר שארף אויסגעשפראכן קעגן כאפן בילדער פון אים.

דער קיוויאשדער רב ז"ל איז אמאל איינגעשטאנען ביי א איד אין קרית יואל אויף שבת, בלייבנדיג געשטראנדעט דארט נאכן באערדיגן זיין מוטער ע"ה ערב שבת נאנט צום זמן, בעפארן אהיימפארן האט דער רב זיך שטארק באדאנקט פארן בעל אכסניא אז ער האט זייער הנאה געהאט, דער איד האט געכאפט די געלעגנהייט און געבעטן אז ער האט צוויי טעכטער וואס ווארטן שוין אפאר יאר אויף זרע של קיימא און זענען נאכנישט געהאלפן געווארן, האט דער רב אים געזאגט: ווער בין איך צו וואונטשן, אבער איך האב געהאט גרויסע זיידעס, אין דעם זכות וואס דו האסט מהנה געווען זייער אייניקל זאלן דיינע קינדער געהאלפן ווערן. וכך הוה, ביז א יאר זענען ביידע טעכטער געהאלפן געווארן.

ער איז אוועק אום כ"ו תשרי התשע"ב. דעם לעצטן טאג פון זיין לעבן מאנטאג פון פרשת נח איז ער אויפגעשטאנען, געזאגט ברכות און געליינט קריאת שמע, געטרונקען און געזאגט אז ער וויל נאכאמאל ליינען קריאת שמע, ויצאה נשמתו. ער ליגט אין דער קיוויאשדער חלקה אין ניו דזשערסי.

                                     

3. משפחה

זיינע קינדער זענען:

  • הרב יצחק מרדכי האלבערשטאם שליט"א, קיוויאשדער רב, איידעם פון רבי בעריש לויפער, א איידעם פון רבי יוסף פאנעט פון דעעש.
  • הרב הערש אלימלך האלבערשטאם שליט"א בארנאווער רב, איידעם פון ראחמיסטריווקא רבי פון אמעריקע
  • הרב ברוך נתן האלבערשטאם שליט"א, אב"ד פון סאטמאר אין לאנדאן, איידעם פון רבי מרדכי שטיין פון פאלטישאן.

זיינע איידימער זענען:

  • הרב אהרן הערש רומפלער זצ"ל פון ירושלים
  • רבי יצחק יוחנן האגער שליט"א וויזשניצער רבי פון וויליאמסבורג, א זון פון רבי מרדכי האגער וויזשניצער רבי פון מאנסי
  • הרב ברוך אברהם פריעדמאן שליט"א דומ"ץ סאטמאר העריסאן, א זון פון רבי ישראל חיים מנשה פרידמאן
  • הרב חנני יו"ט ליפא טייטלבוים שליט"א